Herçiyek bû bêt, musteheqî ew destdrêjiye nabû

بابه‌تی په‌یوه‌ندیدار

babetî peywendîdar

-------------

بۆ شێخ ستارتان لێمان کرد؟ ...

 ڕاڤه‌ محمد

April 27, 2008, 00:05:00

سه ر له‌ به‌ یانی رۆژی چوارشه‌ممه‌ بوو، 5. 3. 2008، به‌ زه‌نگی مۆبایله‌که‌م خه‌به‌رم بووه‌وه‌ که‌  دایکم بوو، ووتی کچم هه‌ستاویت له‌ خه‌و؟ ئه‌و ڕۆژه‌ دره‌نگ ده‌وامی زانکۆم هه‌بوو چونکه‌ تاقیکردنه‌وه‌م هه‌بوو. وه‌ک هه‌موو به‌یانیانی دیکه‌ منیش هه‌ستام و ده‌ست و ده‌موچاوم شۆری و خه‌ریکی جل گۆڕین بووم. ڕێژنه‌ی خوشکم له‌به‌ر تۆزێک نه‌ساخی ته‌ندروستی بڕیاری دابوو ئه‌و ڕۆژه‌ نه‌چێته‌وه‌ بۆ قوتابخانه‌ بۆیه‌ جارێ نوستبوو. هه‌رچه‌ن ماندوو بووم چونکه‌ شه‌وی پێشوو زۆرم سه‌عی کردبوو بۆ ئه‌و تاقیکردنه‌وه‌یه‌، به‌ڵام له‌ هه‌مان کاتدا دڵخۆش بووم که‌ ئیتر به‌هاره‌و زۆری نه‌ماوه‌ بۆ پشووی هاوین بۆ ئه‌وه‌ی خۆم و خوشکه‌که‌م و دایکم سه‌فه‌ری کوردستان بکه‌ین وه‌کوو هاوینانی پێشووتر. دووباره‌ زه‌نگی مۆبایله‌که‌م لێی داوئه‌م جاره‌شیان هه‌ر دایکم بوو. وه‌ڵامم دایه‌وه‌و ویستم بڵێم دایکه‌ گیان هه‌ستام له‌ خه‌و خه‌مت نه‌بێت، به‌ڵام له‌به‌ر گریان و هاواری ئه‌و فریا نه‌که‌وتم هیچ بڵێم، نه‌مده‌‌زانی ئه‌وه‌ گریانه‌ یاخود پێکه‌نین چونکه‌ هه‌رگیز گوێم له‌ دایکم نه‌بووه‌ به‌و شێوه‌یه‌ بگری. ووتم دایکه‌ چیه‌ خێرا بڵێ، له‌ وه‌ڵامدا وتی باوه‌ ستار کوژراوه‌! خۆشم نازانم له‌و چرکه‌یه‌دا هه‌ستم به‌ چی کرد، مه‌حاڵه‌ پێناسه‌ کردنی. به‌ ده‌م گریانه‌وه‌ ده‌ست و برد خوشکه‌که‌م خه‌به‌ر کرده‌وه‌، ئه‌و سه‌ری سوڕماو ترسێکی زۆر دایگرت که‌ منی به‌و شێوه‌یه‌ بینی، پێم ووت که‌ دایکم ئه‌ڵێت باوه‌ ستار کوژراوه‌. وتی چی؟ چۆن؟ که‌ی؟ بۆ؟ له‌ کوێ؟ دڵنیایت که‌ باوه‌ ستاره‌ یان که‌سێکی تر؟

ئاخر چاوه‌ڕوانی مه‌رگی هه‌موو که‌سه‌ نزیک و خۆشه‌ویسته‌کانمان بکردایه‌ چاوه‌ڕوانی شه‌هید بوونی شێخ ستارمان ناکرد، نه‌ک ته‌نها ئێمه‌ به‌ڵکو زۆر زۆر که‌سانی تریش نزیک تا دوور. ئه‌و که‌ڵه‌ پیاوه‌، ئه‌و مرۆڤه‌ دڵپاک و ڕاستگۆیه‌، ئه‌و خه‌زینه‌ی زانست و زانیاری و ڕۆشنبیریه‌، ئه‌و مرۆڤه‌ ئازاوچاونه‌ترس و بوێره، ئه‌و کوردپه‌رسته‌ی ووڵاتی نیوزلاندای جێهێشت و گه‌ڕایه‌وه‌ بۆ باوه‌شی شاره‌که‌ی خۆی، بۆ باوه‌شی که‌رکوکی بێ که‌س تاکو خزمه‌تی بکات و لاوه‌کانی ڕۆشنبیر بکات به‌ وانه‌ وتنه‌وه‌ له‌ زانکۆدا، ئه‌و مرۆڤه‌ 75 ساڵه‌ی هه‌موو ڕۆژێک له‌ گه‌نجێک دڵخۆشتر سه‌ردانی پارچه‌ زه‌ویه‌که‌ی ئه‌کرد که‌ گه‌نم و جۆی لێ چاندبوو وه‌ چاوه‌ڕوانی به‌رهه‌مه‌که‌ی ده‌کرد، چۆن توانیتان ژیانی لێ بسێننه‌وه‌و به‌و فیشه‌که‌ پیسه‌ دڵی سارد بکه‌نه‌وه‌؟؟؟؟ ئایه‌ ئه‌بێت مرۆڤ ئه‌وه‌نه‌ بێ به‌زه‌ی و زاڵم و بێ ویژدان بێت وه‌کو ئێوه‌؟

ئێستاش جارێکم له‌ یاد نییه‌ که‌ به‌ ته‌له‌فون قسه‌مان له‌گه‌ڵ باوه‌ ستار کردبێت و وتبێتی بێزارم دڵگرانم یاخود ته‌ندروستیم باش نیه، هه‌موو کات که‌ پرسیارمان لێ ئه‌کرد چۆنیت له‌ وه‌ڵامدا ئه‌یووت گرمه‌م دێت ئه‌مه‌نه‌ باشم. هاوینان که‌ سه‌ردانی کوردستانمان ده‌کرد شه‌وان دره‌نگ له‌ کۆڵانه‌ تاریکه‌کانی سلێمانی من و خوشکه‌که‌م و کچه‌کانی پوورم و باوه‌ ستار پیاسه‌مان ئه‌کرد وه‌کو وه‌رزشێک، ئه‌و زۆر له‌ ئێمه‌ به‌ تواناتر بوو بۆ ڕێ کردن، کاتێک که‌ ئێمه‌ ماندوو ئه‌بووین به‌ پێکه‌نینێکه‌وه‌ ئه‌یوت به‌خوا عه‌یبه‌ بۆ ئێوه‌ وا ته‌مه‌ڵن. شێخ ستار ته‌نها باپیرمان نه‌بوو، ئه‌و ته‌نانه‌ت له‌ دایکمان و باوکیشمان خۆشه‌ویستتر بوو بۆمان. ئه‌و فێری من و خوشکه‌که‌می کرد که‌ خوێندن و زانستمان خۆش بوێت، فێری کردین که‌ نیشتیمان و خاک و که‌سی خۆمانمان خۆش بوێت گه‌رچی له‌ هه‌نده‌رانیش بژین، فێری کردین که‌ دواڕۆژ بگه‌ڕێینه‌وه‌ کوردستان و خزمه‌تی گه‌له‌که‌مان بکه‌ین.

بۆ ئێمه‌ گرنگ نیه‌ بزانین کێ بوو یاخود کێ بوون ئه‌وانه‌ی ئه‌و کاره‌ قێزه‌ونه‌یان کردو شێخ ستاریان شه‌هید کرد، به‌ڵام ئه‌وه‌ی نووسینه‌کان و کتێبه‌کانی شێخ ستاری خوێندبێته‌وه‌ گومان ناکات له‌وه‌ی که‌ کێ بوون ئه‌وانه‌ی ئه‌و کاره‌یان ئه‌نجام دا‌. شێخ ستار زۆر چاونه‌ترسانه‌ توانی زۆر شت بدرکێنێ که‌ که‌سی تر تا ێستا نه‌یدرکاندبوو‌. وا دیاره‌ تا ئێستا له‌ ووڵاتی ئێمه‌دا که‌س ناتوانێت به‌ ئازادی قه‌ڵه‌م به‌کار بێنێت و ڕاو بۆچوونی خۆی بڵێت، یاخود حه‌قیقه‌تی که‌سانێک بدرکێنێت! په‌ندی پێشینانێکی زمانی فینله‌ندی هه‌یه‌ که‌ ده‌ڵێت فیشه‌ک نان به‌ قاچی خۆته‌وه‌، ئه‌وه‌ی شێخ ستاری شه‌هید کرد له‌ هه‌مان کاتدا فیشه‌کی نا به‌ قاچی خۆیه‌وه‌. ئه‌و فیشه‌که‌ی دڵه‌ پاک و گه‌وره‌که‌ی شێخ ستاری سارد کرده‌وه‌ هه‌ر ئه‌و فیشه‌که‌ بوو که‌ جارێکی تر له‌ دایک بوونه‌وه‌یه‌کی تری بۆ شێخ ستار نووسیه‌وه‌، به‌ڵام ئه‌و ده‌ست چه‌په‌ڵانه‌ ئه‌مه‌یان نه‌زانی. ئه‌گه‌ر پێشتر 10 که‌س شێخ ستاری بناسیایه‌ ئێسته دوای شه‌هید بوونی‌ 100 که‌س ئه‌یناسێت، ئه‌گه‌ر پێشتر 10 که‌س باوه‌ڕی به‌ نووسینه‌کانی هه‌بووبێت ئێسته‌ بووه‌ته‌ 100 که‌س. ئه‌وانه‌ی ئه‌م کاره‌یان کرد له‌ ترسنۆکی و زه‌عیفی خۆیان زیاتر هیچ شتێکیان نه‌سه‌لماند. ئێسته‌ شێخ ستار به‌ جه‌سته له‌گه‌ڵمان نیه‌ و جێی هێشتین و شه‌هید بوونی خه‌م و کۆسپێکی زۆر گه‌وره‌ی بۆ هه‌موو بنه‌ماڵه‌که‌ی و که‌سه‌ خۆشه‌ویسته‌کانی دروست کرد، به‌ڵام ئه‌و به‌ ڕوح دایم له‌گه‌ڵماندایه‌و هه‌رگیز ناتوانین له‌ یادی بکه‌ین. یادگاریه‌کانی شێخ ستار هه‌ر له‌گه‌ڵمان ئه‌بن تا ئه‌و ڕۆژه‌ی ئێمه‌ش ئه‌چینه‌ ژێر گڵه‌وه‌. ئێستاش من و خوشکه‌که‌م و دایکم ناڵێین به‌ گۆڕی باوه‌ ستار، به‌ڵکو ئه‌ڵێین به‌ سه‌ری باوه‌ ستار.

تێبینی

داوای لێبوردن له‌ خوێنه‌ران ئه‌که‌م ئه‌گه‌ر نووسینه‌که‌م له‌ ڕووی زمانی کوردیه‌وه‌ که‌م و کوڕی و هه‌ڵه‌ی تێدا بێت، چونکه‌ ئه‌مه‌ ێه‌که‌م جارمه‌ بابه‌تێک به‌ زمانی کوردی بنووسم.

کچه‌زای شێخ ستار

ڕاڤه‌ محمد - فینله‌ندا

26. 4. 2008

--------

کۆمێنت:

حاجی زه‌رگه

‌  27-04- 2008 - 10:28

خوشکی خۆم راڤه‌خان ... له‌ مه‌به‌ستی نوسین و ئه‌ده‌بیات بگه‌ن ئه‌وسا شت بنوسن ! کوشتنی شێخ ستار چ په‌یوه‌ندیه‌کی به‌ نوسین وئه‌ده‌بیاته‌وه‌ هه‌یه‌ ؟ من له‌م دواییانه‌ زانیم که‌ شێخ ستار کورده‌ ده‌نا هه‌ر به‌ شێخ ستای خائین ده‌مانناسی ، که‌سێک زیاتر له‌ 30 سال له‌ باوه‌ش سه‌ددام و عوده‌ی دابێ ده‌بێ چ ته‌راتیی تیا مابێ ؟ توخوا شه‌رمه‌ جیتر ئه‌وه‌نده‌ باس له‌ جاشه‌کان مه‌که‌ن ، مادام کورد ئه‌وه‌نده‌ وشیارو دلسۆز نه‌بو بۆ دۆزه‌که‌ی که‌ سه‌رتاپای جاشه‌کان دادگایی بکاو له‌ سێداره‌یان بدات ، به‌سه‌ با ئێمه‌ش نه‌ له‌دور نه‌ له‌ نزیک ناوه‌ قێزه‌وه‌نه‌کانیان له‌ بیر که‌ین تا چیتر زامی شه‌هیدانمان له‌ گۆر نه‌کولێنه‌وه‌ ،
له‌ بیرته‌ نامیلکه‌که‌ی شێخ ستار به‌ناوی ( خومه‌ینی خومه‌ بۆ گه‌لانی ئێران ؟) که‌ تیایدا چه‌ند به‌ به‌ژن وبالی سه‌ددام و سوپا کاولکاریه‌که‌یدا ده‌وت؟ ...مردن بۆ هه‌ر که‌سێک ته‌نها یه‌ک رۆژ خزمه‌تی به‌ مه‌رامه‌ گلاوه‌کانی کورد کردبێ ..
حاجی زه‌رگه‌..... له‌ جیات خانه‌واده‌ی شه‌هیدا
ــــــــــ
ئه‌و بابه‌ته‌ له‌ماڵپه‌ڕی کوردستان نێت بڵاوبۆته‌وه‌